ملخص الحكاية
ملاحظة:القاف تلفظ ﭺ الراوية :امال محمد الزيتونية الباحثة:ابتسام الدباغ كان في قديم الزمان ها التلات بنات، بشتغلو بغزل الصوف. التلت بنات هدوله واحدة كبيرة و وحدة وسطى و وحدة صغيرة.اثناء غزلهم الصوف بيتحدتو هالتلات بنات كل وحدة بتحكي الندر الي بدها اياه. الكبيرة بتحكي والله اذا اخدني ابن السلطان لاعمله بساط بكفيه ويكفي عساكره كبير كتير. المتوسطة بتقول والله اذا اخدني ابن السلطان لاعمله فطيرة كبيرة تكفيه وتكفي عساكره. التالتة الصغيرة ايش بتحكي والله لو يوخدني ابن السلطان لاجيبله ولد شقة لولو وشقة مرجان. اثناء الحديث ، كان ابن السلطان بالصدفه مارق وسامع كلام هالتلات بنات. الا هو بيقول يا الله ياريت اروح اشوف هالتلات بنات انا لا بدي بساط ولا فطيرة انا بدي اخد البنت الي بدها تجيبلي الولد الي شقة لولو وشقة مرجان. واثناء حديتهم الا هوه بيدق الباب فتحوا الباب اتعجبوا ! ابن السلطان بيدق ع بنات فقيرات بيشتغلو بغزل الصوف تفاجئوا!!!!!!!!!!! الا قالهم انا سامع حديتكم وكل وحدة بتندر ندر انا بدي الي ندرت الندر التالت وينها؟ خزيت البنت بحالها_ قالها لاتخجلوش قال هيها انا بدي املك عليكي واتجوزك. ” مين اغتاظ” خواتها كيف يتركهم ابن السلطان ويا خدها.عملو العرس واختهم حملت ولمن اجا ميعاد الولادة خواتها مغتاظين منها كيف يتجوزها ابن السلطان وتصير تملك القصر والمال.وقالو طيب احنا بدنا نفكر بحيله نخلي اختنا هادي تنزل عن الملك العرش هاده الي صارلها كله. ولما صارت وقت الولادة راحو للداية يتفقو معها على اختهم على اساس اذا صح ندرها وجابت بنت و ولد . تجيب بسه وكلب وتحطيهم بدل البنت والولدولمن ييجي ابن السلطان ازعلي وعيطي وقولي جابت بسه وكلب. واحنا بنكون جايبين هالصندوق بنحط فيه البنت والولد وبنسكره وبنرميه وين بالبحر_ هادي طمعت العجوزة المحتالة ورضيت بكلام الاختين. ولدت الاخت وجابت الداية البنت والولد ونفذو اتفاقهم وحطوهم بالصندوق وراح الصندوق بالبحر. اجا السلطان قال ايش جابت قالوله وعيطوا جابت بسه وكلب. قال ابن السلطان هاد الي وعدتيني فيه يلا يا خدم على بيت الهجران حملو الوالدة بحالها يا خيستي وحطوها ببيت الهجران ويجيبولها الاكل والشرب وما تطلعش بالمرة. هان نرجع مرجوعنا للصندوق _اخد مساره بالبحر ويوم مارق هالساعي اشي كبير ومعروف بمكانته وعظمته وشهامته بهداك الزمان هاد زي ما تقولو بيخلفش شاف الصندوق من بعيد امر الخدم الي معاه يجيبوا الصندوق قالوا حاضر. _راحوا جابو الصندوق فتحوه لقوا ايش سبحان الله لا عين رات ولا دان سمعت يا سبحان الله_اخدهم وقال انتو من اليوم اولادي واربيكو احسن تربايه امر الحراس ياخدوهم القصر.رباهم احسن ترباية وعلمهم احسن علم صارت البنت صبية والولد شب والبنات بيوم كانوا بيتحدتو اجاهم خبرانه الساعي لقى الصندوق واخد اولاد اختهم وضلو حاطين السر بقلبهم وطمو عليه حتى ما همهم اختهم المسكينه داخل بيت الهجران. لمن كبروا هاولاد هاد الساعي زي ما تقولوا بيطلع رحلات قال لابنه بدي اغيب برحلة وايش بدك بجيبلك ، قاله يابا بدي منك فرسة زرزورية” كبيرة وضخمة مش موجودة الا عند الملوك بهداك الزمان”وسال بنته ايش اجيبلك قالتله ولا حاجه. اتسهل ع الفريه والولد والبنت بالدار والولد حامي اخته_رجع من السفر وبالحواديت بسرعة بيروحو وبسرعه بيرجعو وجاب لابنه الفرسه وفرح فيها. مرض الساعي مرضه كبيرة_حط ابنه وبنته وحكى لابنه اوصيك على اختك انك تكون سند الها ودير بالك عليها انا صرت باخر عمري_قاله الله يعطيك يابا طولت العمر. يوم يومين مات الساعي قعدوا الولد والبنت بالقصر لحالهم قال الولد لاخته بدنا نطلع من العزلة والزعل قالوله صحابه تعال اطلع معنا رحلة واحنا معنا فرسات ملوك قال طيب ايش رايك يختي انا بدي اعرف اذا بتسمحيليبروحواذا بتسمحيش برحش عشان انت برقبتي وبخاف عليكي من نسمة الهوا حست باخوها والعيشة تاعتو قالتلو روح ياخو بس ع شرط انت بتطلع من هان واذا الدنيا شتت اعلم اني بعيط وفقعانه عياط واذا صحيت الدنيا اعلم اني انا بضحك والله يسهل عليك. والله مشي بطريقة وتسهل والدنيامحلاها، وبنص الطريق غيمت الدنيا وها المطر بينزل الا هوه بيقول اه اختي هلقيت بتعيط ايش الي يسكتها لا عندها ابو ولا عندها حدا وملهاش بالدنيا غيري يا صحابي اختي بتعيط وانا بديش اكمل معكم الرحلة_قلبه ضعيف رجع لاخته قالها ليش بتعيطي . قالتله اجت عندي هالعجوزة ودقت علي الدار وقالت افتحي يا بنتي فتحتلها والا بتقولي يا صلاة النبي عليكي وعلى ها الدار وي ما احلى دارك بس ناقصك توب شكندواره يغني ويرقص بالدار الا بتقولها من وين اجيبله؟ العجوزة قالتلها: توب شكندواره بنجاب بس انت خلي أخوكي يسأل عنه يجيبلك اشي يسليكي. قالها ياختي أنا مش عارف وين مكانه وهاد وين.اخته قالتله بعرفش بدي أجيبه ويسليني بالدار. قال: لازم أروح أسأل. راح ع كبار البلد وقلهم في توب شكندواره وين بتوجد؟ قالوله هاد ببلاد غير بلادنا، وطريقه شاقه وبعيده لتصل لهاد التوب وصعب الناس يوصلوله وانت بدك تخاطر ع حالك وتوصله؟ قال:بدي أخاطر على حالي وعلى روحي بس احكولي وين؟ سأل هاد وهاد لحد لما كان زلمه كبير بيعرف وين التوب بس حكالوا بخاف عليك من صحبيته. لأنها بعهدها بتعمل اشي كتير.قاله بيسترها ربنا عشان البي لأختي اللي بدها اياه.دله على الطريق – ركب هالفرسه ومشي في طريقه ودله على الطريق من طرق شعاب وعره وطريق جبال وطريق بدو وسلك هالطريق. لسه في أول بداية طريقه الا ولقى هالغول قاعد بين هالجبل، حوافره اظافيره كبيرة مغروسه في هالارض هالشعر تبعه هالقده هالدقن تبعه هالقده من بعيد بينظر هيك هالشاطر محمد وبيقول يارب بسم الله اعبر ما اعبرش اعبر ما اعبرش الا وهداك لمحه من بعيد وتطلع عليه بهالعينين الحمرة خاف يرجع, قال بلاش ارجع يغدربيا أو يضرني ، كمل طريقة وقال السلام عليكم ياسيدي الغول _ الغول قال: وعليكم السلام لولا سلامك سبق كلامك لخليت الجمل يسمع صوت قرض عضامك_قاله وين رايح يا شاطر محمد. قال والله راح اجيب توب شكندواره وقالولي من الطريق هاد امشي_ الا الغول بيقوله يا شاطر محمد بخاف عليك قاله بيسترها الله الشاطر محمد. بس بطلب منك طلب عشان امرقك من هان قاله قصقصلي اضافري وهفهفلي شعري قاله حاضر. قصقصله اضافيره وهفهفله شعره، وقاله روح الله يشممك روحك متل ما شممتني روحي_ روح اخوي قدامي اكبر مني بيوم افهم مني بسنه_مشي مشي شوي شوي لقى اخوه _ حكاله السلام عليكم ونفس محكاله اخوه الي قبله. قاله وين رايح ياشاطر محمد؟ قاله أجيب توب شكندواره . قاله الغول بخاف عليك . قاله الشاطر محمد بيسترها الله. طلب منه متل اخوه . قصقص اضافره وهفهف شعره . قاله الغول: بدي احكيلك اشي تنفذه، وإلا بيصير فيك زي الناس اللي اجو يوخدوا التوب وما رجعوش . قاله ولا يهمك اللي بتقول عليه بنفذه زي ما بتقول. قاله الغول: روح بتلاقي قدامك تلات بلاطات وحدة سمره وبلاطه حمره وبلاطة بيضة دير بالك البلاطه الحمره خطر اذا كان رجلك لقت البلاطه الحمره هادي. وهو ماشي صار يتطلع من بعيد لقى توبها منشور ع الحبل، قاله بتسحبوا من دون ما تحس عليك واوعى تخبط ع البلاطه الحمرة بتتنبه الغولة. اجا خبط ع البلاطة البيضة والسمره وبشويش سحب التوب عن الحبل واخده قاله الغول يلا يا شاطر محمد حطه على الفرس وراك . اخد التوب ورجع لبلاده راح لأخته لقاها قاعده تستنى اخوها جاب التوب وحطه بالدار فيه كل انواع الالماس والزينة وبيرقص وبيطبل بالدار عملها ضجة وهجة قالها ياختي جبت طلبك اسمحيلي اروح عالرحلة . قالتله طيب روح . تاني يوم عملوا الزاد والزواد وبدهم يطلعوا رحلة الا اخته الشعور الاول رجعلها وقالت لاخوها اذا صحيت الدنيا بكون بضحك واذا شتيت بكون بعيط . راح سيدنا بالله الرحلة انبسط وبدهم ياكلو الا الدنيا بديت تشتي وتمطر قال الشاطر محمد له له له ايش اسوي اختي بتعيط ساب صحابه ورجع لاخته اثناء غيابه كانت جياها العجوزة قالتلها حلو توب شكندواره بس لو تجيبي شكندواره براسها عالدار بتونسك وبتعملك بالقصر فرحه وحس سألها اخوها ليش بتعيطي حكتله بدك تجيبلي شكندواره براسها بعرفش بنفعش التوب لحاله . حكى طيب راح الطريق اللي سلكها بالاول رجع للغول لقاه بنفس قعدته . قال للغول بدي اجيب شكندواره براسها لاختي قاله الغول والله ما بتقدر واعلم انك يا داخل الارض يا اما ما تنوجد صعب تجيبها . قاله الشاطر محمد بيسترها الله . وعمل زي الاول هفهفله شعره وقصقصله اظافره ومشي لقى اخوه الثاني اللي اكبر منه بيوم وافهم بسنه قاله:وين يا شاطر محمد بشوفك رجعت وحكاله زي ما حكا اخوه قاله الغول شوف الارض هادي هدا مش زرع هادول بني ادمين حاولوا ياخدوها براسها خلت الارض تبلعهم وانت بده يكون مصيرك زيهم قاله بيسترها الله بس قولي ايش اعمل سيدنا بالله حكالي المره هاي نفس البلاطات التلاتة وروح وهي نايمه بتلاقي اختي الغولة بتمص من صدرها الشمال مصه ومن صدرها اليمين مصه . بس دير بالك تصحى مشي وراح وخبط عالبلاطه البيضه والسمره ولقاها نايمة اجى بشويش ومص من صدرها اليمين مصه واجى عالشمال الا الغوله بتصحى . قالت :ابلعيه يا ارض. بلعته الارض لحد راسه صار يقول انا جاي اخدك تعيشي عندي بقصر ويترجى فيها ! بس ما رضيت . كان بهداك الزمان الارواح بتتكلم طلعت روح مين؟؟؟ طلعت روح ابوه الساعي قالها يا شكندواره _يا شكندواره هدا اخوكي زي ما ربيتك ربيته روحي معاه اطلعيه من الارض احسنلك. ما رضيت الغولة تخالف امر الارواح وقالت اخرجيه يا ارض اطلعيه يا ارض وطلع الشاطر محمد من الارض لحاله والساعي وصاها تروح معه وين ما بده . ركبت وراه الفرسه الزرزورية وعرفت انه ابن ملوك واشي كبير، قالها ايش هادول يا اختي قصده على الارض حكتله هدول كانوا بدهم ياخدوني وبلعتهم الارض قالها بدي منك طلب يا اختي حرام يضلوا بالارض اطلعيهم . اخدت حبة رمل بايديها وعفرته عفره كبيره وقالت اخرجيهم يا ارض الا ايش ناس كتير شباب وبنات طلعوا وعفت عنهم . ركبت الفرس واخدها لاخته بالقصر وحكتله بدي اعيش معك وين ما بدك ولبست توبها وصارت تغني وترقص بهالدار على طول . سأل الشاطر محمد اخته يروح عالرحلة _وافقت. راح وانبسط والشمس حلوة ورجع اخر النهار اجت العجوز للبنت وحكتلها هالقيت الدار حلوه وانا اطمنت عليكي في ناس تونسك . يوم من الايام هالباب بيدق جاي دعوه من ناس عارفين قصة الاولاد والخالات قصرهم جمب قصر السلطان بدهم يعزموهم على زواج ابوهم السلطان على امهم “اللي في بيت الهجرات” وعزموهم عالعرس . من بين المعازيم الخالات راحوا وعملوا حالهم بيعرفوش الخالات وخالاتهم ما حكولهم انه هدا عرس ابوهم بس بعتو ناس وحكوا لهم الحقيقة وفهموهم انهم اولاد ملوك وسلاطين ومش من الشوارع رباكم الساعي المهم اولاد الحلال حكوا لهم الحقيقة اللي سمعوها من خالاتهم اليوم عرس ابوكوا الحقيقي . راح العرس لبسوا احلى لبس وقعدوا جنب ابوهم_كان هداك الوقت الكل يعبر العرس . الولد لابس زي الملوك والبنت زي الملوك الا خالاتهم من حد ما شافوهم عاللوج انغاظوا من اولاد اختهم وحكولهم انزلوا انزلوا انزلوا _انزلوا تحب انتو ليش هان الا البنت والولد يا حرام ايش بيقولوا : يا بدور يا بدور شوفي القمر كيف بيدور الدار دار ابونا اجو الغرب يطحونا كل ما يطردوهم يقولوا هيك . الاب رخى ودن وقال للاولاد عيدوا اللي بتقولوه قالوا : يا بدور يا بدور شوفي القمر كيف بيدور الدار دار ابونا واجو الغرب يطحونا . قال السلطان :هدي داري _انتو شو قصتكم ؟ قالوله احنا اولادك قال انتو كيف اولادي؟ حكوله احنا زمان خالاتنا رمونا بالبحر وجابوا بدالنا بسه وكلب وحطوهم مكانا وامنا المسكينة خلفتنا . تذكر السلطان وعد الام _وقالهم وين امكم ؟ قالوا مهجوره بنعرفش _قالهم اااااه امكم يبقى اللي ببيت الهجران . صاح السلطان يا عالم يا هو يا ناس اللي بيعرف حاجة عن هدول الولدين او الحقيقة اله عندي جائزة . والناس بترغب المال وكلهم فقراء ناس بيعرفوا القصة مع الخالات والولدين حكوا . سألهم طيب وين الخالات مين بيعرفهم_اطلعوا هيك الا بيقولوا هي خالاتهم . قال السلطان تعالوا العقاب عليكم وامر الجواري يطلعوا ام الاولاد من بيت الهجران ويغسلوها باطيب عطر يعطروها وبتاج الملوك زينوها وقال لعروسته اللي عاللوج روحي عند اهلك وخدي من المال قد ما بدك بس بدي ارجع ام الولد والبنت شق لولو وشق مرجان وأكافئها . طلعوها من بيت الهجران غسلوها ولبسوها وتوجوها وقعدوها عاللوج واخدوا الخالات على بيت الهجران مدى الحياة وربطوهم بالجنازير وسكروا عليهم وصاروا بدل الام . الام لبست التاج وحكولها هدول اولادك حمدت ربنا وشكرته وطلب ابن السلطان منها الغفران وعاشوا عيشه طيبة .وتوتة توتة فرغت الحدوتة. الراوية :امال الزيتونية_ غزة المعاني: ـــــــ التلات: الثلاثة الندر: النذر بشتغلوا:يعملوا اذا اخدني:أي تزوجني مارق: مار من الطريق بدي: اريد ياخيستي:تعبير عن الحزن لقت: مست اللوج:مكان جلوس العروسين نموذج بيانات حول الر اوي اسم الباحث:ابتسام عبد الكريم محمد الدباغ اسم الراوي :امال محمد الزيتونية عمر الراوي: 43 سنه المهنة الحالية:ربة منزل المهنة سابقا”إذا كان متقاعد:/“ حضور (غير الراوي):افراد عائلة الراوية وعددهم كان 5ـ) الحالة الاجتماعية للراوي: متزوجة عدد سنوات تعليم الراوي :التوجيهي مجال الدراسة(ما بعد الدراسة ):/ تاريخ المقابلة :25 ـ8ـ 2007 مكان المقابلة :حديقة المنزل مكان سكن الراوي: غزةـ الدرج القرية/ المدينة الأصلية (للاجئين) : غزة من من سمع القصة أول مرة؟ من الجدة ثم الام متى كان ذلك؟ كان عمر الراوية 6 سنوات مدى تصديقه لأحداث القصة:يعرفون انها خيال هل يروي هذه القصة عادة؟لمن؟ تحت أي ظروف؟ احياناـ للاولادـاحيانا لظروف امنية ترويها لتسلي الاولادـواحيانا عند انقطاع الكهرباء كم مرة يرويها في السنة، أو الشهرمثلا؟ مرات قليلة متى كانت آخر مرة رواها، ولمن رواها؟من شهرين هل غير أو ادخل أشياء في القصة بقصد،وما هي؟ لا تعلم لكنها تقول الذي تتذكره هل يعتبر القصة خاصة لمجموعة معينة:سن، جنس، علاقة اجتماعية،: القصة للاطفال الابولاد والبنات وعادة هم يطلبوا من الام ذلكعلاقة دم: للجامع: اكتب ملاحظاتك وانطباعك عن الراوي والإطار المحيط والبنية العائليةوالاجتماعية والوضع الاقتصادي للعائلة، مدى المحافظة، مدى التدين خصوصا أسلوبالراوي ومدى حفظة للقصة ، استعمال حركات الجسم واليدين وتعابير الوجه للمساعدة فيالتعبير. ملاحظات الباحثة: الراوية من سكان غزة والوضع الاقتصادي لاسرتها متوسط وهي من عائلة محافظة ولديها سبع من الابناء ـ اسلوب الراوية كان واضح ومشوق حيث انها كانت تستخدم بعض الحركات في اليدين والوجه في اوقات الذروة في القصة.ذكرت هذه الحكاية في: